Jańalıqlar

Milletlerara tatıwlıq hám doslıq – rawajlanıw faktorı


YUNESKO Bas konferenciyasınıń 1995-jıl 16-noyabrde ótkerilgen 28-sessiyasında qabıl etilgen «Keńpeyillik principleri deklaraciyası» dúnyada tınıshlıq hám tatıwlıqtı támiyinlew insan huqıqları hám erkinlikleriniń kepilligin, teń huqıqlıq jáne óz-ara birge islesiw qatnasıqların rawajlandırıw jolındaǵı áhmiyetli adım bolıp xızmet etpekte.

Sonlıqtan barlıq mámleketler qatarı biziń elimizde de 16-noyabr «Milletlerara tatıwlıq kúni» sıpatında keń belgilenedi.

Elimizde sociallıq-ekonomikalıq hám siyasiy tarawlarda ǵana emes al, topıraǵımızda jasap kiyatırǵan túrli millet hám elatlardıń arasında doslıq baylanısların jáne de bekkemlew, diniy keńpeyillik principlerin qarar taptırıwǵa da ayrıqsha itibar qaratılıp kelinbekte.

Búgingi kúnde keńpeyillik insaniyat tárepinen erisilgen eń úlken jetiskenliklerdiń biri esaplanadı. Sonday-aq, ol rawajlanıw ushın da áhmiyetli faktor bolıp xızmet etedi.

Ɵzbekstanda keńpeyillik siyasatı sebepli házirgi waqıtta bir pútin shańaraq bolıp jasap kiyatırǵan 130 dan aslam millet wákillerine óz ana tili, úrp-ádet hám salt-dástúrlerin rawajlandırıw ushın da barlıq sharayatlar jaratılmaqta.

Puqaralardıń ana tilinde bilim alıw imkaniyatın támiyinlew maqsetinde jaratılǵan imkaniyatlar nátiyjesinde mámleketimizdegi bilim beriw mákemeleri menen ǵalaba xabar quralları ózbek, qaraqalpaq, rus, qazaq, qırǵız, tájik hám túrkmen tillerinde jumıs alıp barıp atır. Bul óz gezeginde xalıqaralıq jámiyetshilik tárepinen unamlı qabıl etilmekte.

Sonday-aq, mámleketimizde milliy mádeniy oraylardıń baslamaların qollap-quwatlaw, milleti, dini hám isenimine qaramastan puqaralar sanasında kóp milletli bir pútin shańaraq sezimin bekkemlewge joqarı itibar qaratılmaqta.

O’ytkeni milletlerara tatıwlıq hám doslıq rawajlanıwdıń baslı faktorı bolıp xızmet etedi.

QR Ministrler Keńesi Málimleme xızmeti