Jańalıqlar

Senator oqıtıwshılar hám ata-analar menen ushırastı


Búgin, Ózbekstan jaslar isleri agentligi Qaraqalpaqstan Respublikası basqarması baslıǵı, senator Daniyarov Abatbay Saparbaevich Taxtakopir rayonı aymaǵındaǵı XXBne qaraslı 7-sanlı ulıwma bilim beriw mektebinde bolıp, mektep oqıtıwshıları hám ata-analar menen ushırastı.


Ushırasıwda senator Abatbay Daniyarov Ózbekstanda bilimlendiriw sistemasın jáne de jedellestiriw hám ilim-pán tarawın rawajlandırıw máselesinde qabıl etiliwi názerde tutılǵan Prezident Pármanı joybarınıń mazmun-mánisi, sonday-aq elimizdegi mámleketlik hám jaslar sıyasatı boyınsha ámelge asırılıp atırǵan ámeliy ilajlar hám áhmiyeti haqqında keńnen túsinik berdi.


Sonday-aq, bul mektepti bıyıl jámi 31 pitkeriwshi jas tamamlaǵan bolsa, sonnan tek ǵana 3 jastıń JOOna kiriwi mektep ushın da, ata-ana ushın da maqtanıshlı jaǵday emesligi, oqıwshı jaslardıń minez-xulqı, ádep-ikramlılıǵı, umtılıwı, keleshekke degen kóz-qarasınıń qaliplesiwi tek ǵana oqıtıwshılardıń ǵana qollap-quwatlawına emes, ata-analardıń da perzentlerine degen itibarına baylanıslı ekenligi haqqında sóz etti. Sonlıqtan, jaslar tárbiyası hám olardı qollap-quwatlaw ushın bárshe birdey juwapker ekenligin, búgingi ushırasıwda senator turmıslıq mısallar menen atap ótti.


Ushırasıwda senator mektep oqıtıwshıları, oqıwshı hám olardıń ata-anaları menen birgelikte turaqlı islesiwin hám nátiyjelerge erisiw jolında zárúr ilajlar ámelge asırılıwın bildirdi. Ata-analar da óz perzentleriniń keleshegi ushın juwapker ekenligin jáne bir márte sezindi, – deydi ilaj qatnasıwshısı Yulduzxan Spandiyarova.

@jaslar_isleri_agentligi