Jańalıqlar

Qaraqalpaqstanlı 4 kewilli jas «Mehr-saxovat» kókirek belgisi menen sıylıqlandı


Bárshege málim, usı jıldıń 26-may sánesinde global pandemiya jáne túrli tábiyiy apat hám ayrıqsha jaǵdaylarǵa qarsı gúresiw, olardıń aqıbetleriniń aldın alıw, xalıqtıń sociallıq qorǵawǵa mútáj qatlamların hár tárepleme qollap-quwatlaw, bul baǵdardaǵı jumıslardı ulıwmaxalıqlıq háreket dárejesine kóteriwge úlken úles qosqan, jámiyetimizde tınıshlıq, doslıq hám tatıwlıq ortalıǵın bekkemlewde belsendi qatnasıp atırǵan, biyǵárez kómek járdemi jáne iygilikli isleri menen hámmege órnek bolıp atırǵan watanlaslarımızdı múnásip sıylıqlaw maqsetinde «Mehr-saxovat» kókirek belgisi menen sıylıqlaw haqqındaǵı Prezidentimiz Pármanı taytıyıqlandı.

Xalqımızdıń salamatlıǵı hám mápi ushın gu’resken bir topar kewilliler de «Mehr-saxovat» kókirek belgisi menen sıylıqlandı.
Milliy qádriyatlarımız hám dástúrlerimizdi múnásip dawam ettirip, xalıqtıń sociallıq qorǵawǵa mútáj qatlamların hár tárepleme qollap-quwatlaw, olarǵa biyǵárez kómek beriw boyınsha jumıslardı ulıwmaxalıqlıq dárejesine kóteriwge úlken úles qosqan qaraqalpaqstanlı 4 kewilli jas bul sıylıqqa ılayıq dep tabıldı.


Búgin, 14-oktyabr kúni Jaslar orayı májilisler zalında sıylıqlaw máresimi bolıp ótti. Máresimdi Jaslar isleri agentligi Qaraqalpaqstan Respublikası basqarması baslıǵı, senator Daniyarov Abatbay Saparbaevich ashtı hám kewillilerdi qızǵın qutlıqladı.

Máresimde «Jaslar- keleshegimiz» fondınıń orınlawshı direktorı Sattarov Xayrulla Fayzullaevich qatnasıp, óziniń kewillilerge degen minnetdarshılıǵın bildirip, qutlıqladı.

Pandemiya dáwirinde qáwenderlik kórsetken «Jaslar – keleshegimiz» fondı Qaraqalpaqstan Respublikası aymaqlıq koordinatorı Bolatbek Baxbergenov hám 1197 qısqa nomerli «Call center» orayında biyǵárez xızmet kórsetken kewilli jaslar Salamat Saydjanov, Gulzar Erkebaeva, Bekbosın Adilbaevlarǵa Mehr-saxovat» kókirek belgisi saltanatlı tapsırıldı.


Jaslar isleri agentligi Qaraqalpaqstan Respublikası basqarması iygilikli isleri hám biyǵárez qáwenderlik járdemi menen kópshilikke órnek bolǵan kewillilerdi sheksiz húrmet penen qızǵın qutlıqlaydı!