Jańalıqlar

Nókis qalasında ekobazar shólkemlestiriledi


Nókis qalasında qolaylıqları hám imkaniyatları boyınsha sawda oraylarınan qalıspaytuǵın jańa formattaǵı bazar – ekobazar shólkemlestiriledi. Bul haqqında paytaxtımızdaǵı investiciyalıq joybarlar haqqında xabar beriwshi «Nukus 24» kanalı xabar berdi.

Ekobazar paytaxtımız turǵınları ushın taza hám tábiyǵıy awıl xojalıǵı ónimlerin qolaylı jáne arzan bahalarda satıp alıw imkaniyatların arttıradı.

Modernizaciyalanǵan bunday bazardıń qolaylı tárepleri:

– Ónimlerdi tikkeley jetistiriwshi – fermer xojalıqlarınıń ózinen satıp alıw múmkinshiligi;

– Palız ónimleri, miywe, gósh, nan ónimleri, ishimlikler hám barlıq gastronomiyalıq talaplardı bir jerden pitkeriw imkaniyatı;

– Hár bir qarıydar onlaǵan satıwshılar arasınan ózine kerekli bolǵan ónimdi qolaylı bahalarda tawıp alıw múmkinshiligi;

– Bazarda keń sawda zalı bolıp, kondicionerler menen támiyinlenedi, jılıtıw sistemaları, ıqsham hám taza vitrinalar, kewilli atmosfera, azıq-awqat ónimlerin tasıw ushın tirkemeler boladı.

Bazardıń shólkemlestiriliwi qala turǵınlarınıń jasaw jaǵdayların jaqsılap, joqarı sapadaǵı ónimlerdi satıp alıwına imkaniyat jaratadı.

 

Islam Matekov,

Qaraqalpaqstan xabar agentligi.