«Qaharmanlar virtual muzeyi»

Jeńistiń 75 jıllıǵı múnásibeti menen jańa «Qaharmanlar virtual muzeyi» joybarı ámelge asırıladı


Dıqqat, dıqqat, dıqqat!!!

Ekinshi jáhán urısı hám fashizm ústinen erisilgen jeńistiń 75 jıllıǵın keńnen nıshanlaw maqsetinde Ózbekstan «VETERAN» jawınger-nuranıyler hám nagiranlar birlespesi Qaraqalpaqstan bólimi hám Ózbekstan jaslar awqamı Qaraqalpaqstan Respublikalıq Keńesi baslaması menen «Eslew-máńgi, qádir-múqáddes!» uranı astında «Qaharmanlar virtual muzeyi» joybarı ámelge asırılmaqta.
Joybardı ámelge asırıwdan tiykarǵı maqset: jaslarǵa 1941-1945-jıllardaǵı Ekinshi jáhán urısında kóp milletli Ózbekstan xalqı urıs maydanlarında hám front artında mártlik hám qaharmanlıq kórsetip, fashizm ústinen erisilgen jeńiske múnásip úles qosqan qaharmanlıqların xabar texnologiyaları arqalı keńnen sáwlelendirgen halda, úgit-násiyatlaw hám puqaralardıń Ekinshi jáhán urısı haqqındaǵı túsiniklerin bekkemlewden ibarat.
Joybarda qatnasıw niyetindegi jaslar @t.me/jenistin_75_jilligi telegram toparına aǵza boladı hám Ekinshi jáhán urısında hám front artı islerinde qatnasqan ata-babaları, kempir-apaları, ata-analarına tiyisli súwretler, xatlar, gazetalardaǵı maqalalar, urıs dáwirindegi áskeriy kiyim-kenshekler hám sawashqa derek basqa da zatlar súwretlerin qısqasha twsindirmesi menen telegram kanalǵa jollaydı.

Sizde maǵlıwmat hám derekler barma?
Asıǵıń!
«Qaharmanlar virtual muzeyi»n birgelikte jaratamız.