Biziń maqtanishimiz!

Xosh хabar:🏆 «Jas kitapqumar -2019» Respublikalıq tańlawınıń ekinshi «Spark» avtomobili Qaraqalpaqstanlı Shaxzoda Kárimbaevaǵa nesip etti.


JÁNE BIR OQÍWShÍMÍZ «SPARK» AVTOMAShINASÍN JEŃIP ALDÍ

«Jas kitapqumar-2019» tańlawınıń  Ózbekstan Respublikası basqıshında 15-19  jastaǵı qatnasıwshılar arasında Tórtkúl rayonındaǵı 12-sanlı ulıwma bilim beriw mektebiniń 10-klass oqıwshısı Shahzoda Karimbaeva  jeńimpazlıqtı qolǵa kirgizip, Prezidentimizdiń sawǵası-«Spark»avtomashinası menen sıylıqlandı.

Prezidentimizdiń baslaması menen jaslardıń ruwxıy dúnyasın bayıtıw, olardı kitap oqıwǵa qızıqtırıw, kitapqumarlıq mádeniyatın arttırıw, solay etip, jas áwladtıń ruwxıy-intellektuallıq potencialın, sana-sezimin hám dúnya tanımın keńeytiwge ayrıqsha itibar qaratılmaqta. Sebebi, bilimli, ozıq oylı, tuwılǵan eline hám xalqına sadıqlıq sezimi menen jasaytuǵın bárkamal shaxstı tárbiyalawda kitapqumarlıq ayrıqsha áhmiyetke iye. Bunda Ózbekstan Respublikası Prezidentiniń 2017-jıl 13-sentyabrdegi «Kitap ónimlerin basıp shıǵarıw hám tarqatıw sistemasın rawajlandırıw, kitap oqıwdı hám kitapqumarlıq mádeniyatın arttırıw jáne úgit-násiyatlaw boyınsha kompleksli ilajlar baǵdarlaması haqqında»ǵı qararı, sonıń menen birge elimiz boylap jaslar arasında keńnen engizilip atırǵan «Bes baslama-bes imkaniyat» súreni astındaǵı baslama áhmiyetli baǵdarlama bolıp xızmet etpekte.

Bul baǵdarda respublikamızda da keń kólemli jumıslar ámelge asırılmaqta. Ótken jılı Kegeyli rayonınan Nursılıw Qoqanova «Jas kitapqumar» tańlawınıń Ózbekstan Respublikası basqıshında birinshi orındı iyelep, Prezidentimizdiń sawǵası-«Spark»avtomashinası menen sıylıqlanǵan edi. Mine jáne bir oqıwshımız jeńimpazlıqtı qolǵa kirgizdi.

Álbette, bilim, miynet, tınımsız izlenis hesh waqıtta itibardan shette qalmaydı. Shahzoda Karimbaeva  ótken jılı usı tańlawdıń 10-14  jastaǵı qatnasıwshıları arasında ekinshi orındı iyelep, kompyuter komplekti menen sıylıqlanǵan edi.